粤语《出师表》古惑仔版

三国文化博览

　　你伯爷出嚟行，半路就去咗卖咸鸭蛋。睇个势，而家个地盘分成三嚿，益州睇嚟都系保唔住口架啦，以后个世道睇嚟都几难捱。但系你伯爷留低班细嘅都好忠心，班懵炳出去劈友连命都唔要，呢啲都系睇在你老窦以前畀钱又畀女嘅份上，而家想报答返你啫。嗱，阿叔我而家就只系想你醒醒定定，搞掂你老窦嘅遗愿，等班兄弟都有得威，千祈唔好将自己当成一嚿叉烧，辜负咗班手足。
　　家阵班兄弟都系自己友嚟嘅，想闹边个掴边个，都要公平；唔畀心机做嘢嘅，成日喺度搞三搞四嘅，同埋份人忠忠直直嘅，就交畀保卫科，应该斩手嘅斩手，应该升职嘅就升职，噉样就表现到你对大家都系公平嘅，你千祈唔好帮埋一边，对大家大细超。
　　郭仔、费仔、董仔，份人都好老实，做嘢好周到，你伯爷在世嗰时就特别睇得起佢哋，临死前嗌佢哋好好噉帮你。阿叔我话斋，会入边大大细细嘅事都可以交畀佢哋。
　　你嗰个懵炳向叔，人好好，亦都好生猛，劈得玩得，你伯爷都话佢“掂”，你得就提拔下，我觉得收陀地劈友嘅嘢就交畀佢，一定可以搞大我哋个地盘，以后就冇人敢惹我哋口架啦。
　　我哋旧时个会点解开始咁劲，就系因为一直收埋啲老实人，赶走晒啲呃饮呃食嘅，后嚟点解会搞到咁衰，就系因为身边剩番班口噏噏当秘笈嘅废人，你伯爷以前次次同我倾偈，讲起呢单嘢都赤赤痛。侍中、尚书、长史、参军，呢几条友都系阿叔我斩过鸡头嘅好兄弟，你一定要信佢哋，我哋重振雄风之日就旨意晒你啦！
　　 阿叔本来就系个耕田佬，喺南阳都有番几块田，喺呢个人队人嘅年代，我不想队人，只系想唔畀人队。你伯爷唔嫌弃我，三日唔埋两日就走去我屋企，问我点搞好个会，阿叔我就感动到飙晒马尿，噉就跟咗你老窦啦。后嚟我哋会同操爷个会开片，衰咗，阿叔我撑住成个会，到而家都廿几年啰。
　　你伯爷知你阿叔我醒目，所以卖咸鸭蛋之前就将啲大事都交托晒畀我，自从换咗你做阿头之后，我就日日失眠，担心辜负咗大佬嘅心意，所以五月嗰时就带住班手足开船过河，去嗰个山旮旯嘅地方，搞掂晒所有应该搞掂嘅嘢。而家南边冇人再敢搞三搞四，我哋班僆又人强马壮，应该好好哋畀班手足疏乎下。然后再将中原打番返嚟，将嗰啲冇本心嘅二五仔通通做低晒，将我哋嗰啲忠字头嘅都扶番起身。噉样我就算对得你伯爷住啦。至于要点搞，冧桥呢啲噉嘅嘢就要靠攸之、祎仔、允仔佢哋啦。
　　我帮你劈埋今次友，捞唔掂你就捉我去祭旗。如果个场口唔够旺，就去闹臭丧郭嗰几条茂利。你自己都要生生性性，唔好畀人睇衰。
　　我就走口架啦，写呢篇嘢真系写到成壳眼泪鼻涕，都唔知写紧乜，你自己执生。